A Proclamation of Henry III, 1258

 Henri, thurgh Godes fultume King on Engleneloande, Lhoauerd on Yrloande, Duk on Normandi, on Aquitaine, and Eorl on Aniow, send igretinge to aIle hise holde, ilærde and ileawede, on Huntendoneschire. Thæt witen the wel alle thæt we willen and unnen thæt, thæt ure rædesmen alle, other the moare dæl of heom, thæt beoth ichosen thurgh us and thurgh thæt loandes folk on ure kuneriche, habbeth idon and shullen don in the worthnesse of Gode and on ure treothe, for the freme of the loande thurgh the besighte of than toforeniseide redesmen, beo stedcfæst and ilestinde in alle thinge a buten ænde. And we hoaten alle ure treowthe in the treowthe rthæt heo vs othen, thæt heo stedefæstliche healden and swerien to healden and to werien tho isetnesses thæt beon imakede and beon to makien, thurgh than toforeniseide redesmen, other thurgh the moare dæl of heom, alswo alse hit is biforen iseid; and thæt æhc other helpe thæt for to done bi than ilche othe agenes alle men right for to done and to foangen. And noan ne nime of loande ne of eghte wherthurgh this besighte mughe beon ilet other iwersed on onie wise. And gif oni other onie cumen her ongenes, we willen and hoaten thæt aIle ure treowe heom healden deadliche ifoan. And for thæt we willen thæt this beo stedefæst and lestinde, we senden gew this writ open, iseined with ure seel, to halden amanges gew ine hord.

Witnesse vsseluen æt Lundene thane eghtetenthe day on the monthe of Octobre, in the two and fowertighthe geare of ure cruninge.

And this wæs idon ætforen ure isworene redesmen, Boneface Archebischop on Kanterburi, Walter of Cantelow, Bischop on Wirechestre, Simon of Muntfort, Eorl on Leirchestre, Richard of Clare, Eorl on Glowchestre and on Hurtford, Roger Bigod, Eorl on North­folke and Marescal on Engleneloande, Perres of Sauueye, Willelm of Fort, Eorl on Aubemarle, lohan of Plesseiz, Eorl on Warewik, lohan Geffrees sune, Perres of Muntfort, Richard of Grey, Roger of Mortemer, Iames of Aldithele, and ætforen othre inoghe.

And al on tho ilche worden is isend into æurihce othre shcire ouer al thære kuneriche on Engleneloande, and ek in-tel Irelonde

 

 

[Early Middle English Texts, ed. Bruce Dickins & R.M. Wilson (Bowes & Bowes: London, 1951), 8-9.]